Dondie Labajo's blog

Dondie Labajo's picture

ANG MABUNDAKONG KAPIYESTAHAN

Gisugat ang kapiyestahan 
sa pagbundak sa uwan
daghan unta og giplanohan
nagkiat na unta sa dalan
mga agik-ik na unta ang madunggan
bahalag sinsilyo ra ang gisuksok's kiliran
apan unsaon taman?
Aw padayon gihapon sa selebrasyon!
Mabundakong kapiyestahan mga talisaynon!

-Donz 10/15/17

#VivaSantaTeresa 

Dondie Labajo's picture

TUNGOD'S GUBOT

Ang mga langawng' puwag lubot
nahipos tungod's gubot
nikaratil kay adunay hisgot-hisgot
nga adunay pistulang gihulbot.
Nanagan bisan og walay labot
mga dagway dili na ma sabot
daw nagngiyaw nga lubot 
sa kakuyaw nangupot sa pagkahuot
dala pa gyud kumot daw naay kalagot...

--Donz 10/15/16

#LastNight 

Dondie Labajo's picture

"MISTERYO SA KINABUHI"

Gisabak ug giutong kas imong inahan
KALIPAY maoy misteryo sa imong adlawng natawhan
Bulahan ka sa mga taw'ng tanan
kay ikaw nagdakong himsog ug buotan

Apan mga problema nag-alirong sa imong dalan,
KASAKIT maoy misteryo sa imong pagbangutan
daw gigaid ug gihampak ka's tibuok kalibutan
kay ikaw nahisalaag ug walay nay paingnanan

Apan may milagro ug mihangad kas kalangitan
KAHAYAG maoy misteryo sa imong pagpakigbisog sa kadautan
maayo nalang kay sa pagmata aduna pay na sigpatan
kay ikaw nagmasaligon bisan atoa sa maangit-ngit nga kalibunan

Ug sa imong katiguwangon
HIMAYA maoy misteryo sa imong kamatayon
Bulahan ka sa mga patay'ng tanan,
kay ikaw nahanaw sa kalinaw kauban ang mga anghel's kalangitan.

-Donz 09/07/17

Dondie Labajo's picture

MGA BALAK

Naglakaw'ng way saplot
wala nay kabuot
nangita na'g gubot
magstorya nag' bot-bot
kung sabyan, mosamot
kung suphon, mapungot
demonyo maglagot
gakayo ang kamot
kay gidali'g hurot
kabayong gisingot
ang bulsa nabuslot
hubog na ang piskot!

"Hubog na ang Piskot!"
-Donz 07/20/17

 

Nakita ko na ang dalan
paingon's kamatuoran
nga labong murag daruhan
apan, dagha'g apan-apan
simbolo sa kagawasan--
paglayat's wa'y kahumanan
atong pagahinumduman
sa pag-abot's paingnanan
mahanaw ang tanan-tanan
mabilin ang kasayuran
nga ang dalan naa's dughan.

"Ang Dalan"
-Donz 07/20/17

Dondie Labajo's picture

"HUSTISYANG GIPANGAGAN"

Ang espadang duhay-ngilit gikuptan
hait man unta apan natay-an
dinunggab sa mga dili sad-an
apan tan-awa kinsay pa'y naduslakan?

Ang bulawanong timbangan
timbang-timbangon ang tanan
pero nganong walay gramo ang mga taw'ng nagbangutan?
maayo pag ipatimbang na! naa pay kapuslanan!

Mga matang gipatabunan
wala na'y laing makit-an
kangit-ngit ras' kalibutan
buta nas' kahayag ug sa kamatuoran

Balaod alang sa katawhan
mao untay maghata'g kaayuhan
ug maoy dalangpan sa mga luhaan
apan sayri, gitiklo niini ang kagawasan

Kalooy sa mga nadakpan
gipriso nga walay kasal-anan
gidaog-daog lang sa prisohan
labi nag ang sentensya "pagkapriso sa kahangturan"

Hustisya, kinsa pamay among duolan?

Dondie Labajo's picture

"SAMIN"

Ako ang imit nga kalibutan
diri kana hikaplagan ang kinopya sa tanan
ang ilusyon ug ang kamatuoran
akong doblehon apan dili pun-an

Ako ang ika-upat nga mata
kanako lamang masayran ang mga buta mong mga mata--
libat ang una ug ikaduha
ang ikatulo dili pud mo buka

Usa ra ang akong gahom
kana ang pagpakita sa imong katahom
ug usahay masina ako kaninyong mga adunay dagway
kay ako bildo rang mabuak ug iglalabay

O, ako si Samin
kaninyo nagpapansin
hinaot nga inyong napalaminan
nga kamo bulahan sa tanang binuhat sa kalibutan...

--Donz 05/24/17

#Mirror ;) 

Dondie Labajo's picture

"Takna sa Kamingaw"

Takna sa kamingaw

dunay mabating hagawhaw

mga singgit sa kagahapon

ug mga hunghong sa umaabot puhon

 

Ang huros sa hangin

manggitik daw gusto magpapansin

ug ang mga bato sa langit

nagapangidlap daw naay gustong ipaambit

 

Pero adunay utlanan ang tanan

nahanaw ang mga tingog sa'kong dunggan

gitapos sa hangin ang iyang pakighinabi kanako

ug ang bato nahimo nang aso.

Dondie Labajo's picture

"Kalipay sa Gugma ni Inday"

Inday, sa imong pahiyom 
wala ako magdahom
nga ako manglagom 
wala mamuwa, kay ako itom.

Usahay rani nako masinati 
Ang makaboang nga gibati 
kay kanimo inday 
nakita ko ang tinuod nga kalipay

Walay kahumanan lagubo ning dughan 
basta ikaw akong makit-an 
"togdog, togdog" mao ra gayuy madunggan 
Kalami sakong gibati, di najud mapugngan.

Sauna ikaw usa rajud ka pangandoy 
nga mamahimo kang dahon sa'kong layang kahoy 
apan karon, ikaw na'ng unggoy sa'kong kasagingan;
ang apan-apan sa'kong lunhaw'ng daruhan.

Relasyon? Gatoo kog yano-yano rani 
sama sa pagkaon og mani 
pero lisod pa diay's paghigop og init nga sikwati 
Busa inday, magtinabangay gayud ta ani.

Dondie Labajo's picture

LAMI APAN SAKIT…

Nasugdan ang pagbati tungod sa usa ka pahiyom
nitul-id ang lumoy nga . . . paglaum
nidako ang gamay nga . . . pagsalig
ug wa kaagwanta gipagawas ang . . . kakilig

Gihapyod mo ang nangisog kong . . . kasing-kasing
imong gi am-aman aron pagduha-duha mo kaging
imong gi kumot-kumot daw linusak nga saging
ug imong gi hilot-hilot daw napiang

Ug sa dihang nagkasulod kos imong mahuot nga . . . dughan
ang kalami sa gibati dili mapugngan
makashagit ako sa . . . kalipay
bahalag usahay maka utong ug makaingo’g ‘agay!’

Apan sa kataposan nipilit ang kasakit
nagdali-dali kang nag-ilis ug gibiyaan mo ako sa kangitngit
imong gipasagdang nagtulo-tulo ang . . . akong mga luha
wa man lang nimo trapuhi o sawra…

–Donz 01/27/17

 

Dondie Labajo's picture

GUGMA SA KAUGALINGON <3

Hangtod kanus-a pa ang pag-antos alang sa gugma?
Kasing-kasing bun-og na niining grasya nga daw sumpa
itom na ang buhagay sa dugo, di najud maporma
apan nilahutay gihapon alang sa hinigugma

Apan tawo raman, kapasidad sa pag-antos dunay utlanan
Dili pareha sa ‘robot’ nga dili masakitan
pero nganong pirmente mang duwa-duwaan?
mao naba ni ang mapait nga kapalaran?

‘AGAY!’ mao ra gayuy malitok
ang sogsog sa dughan mo ngutngot tagalihok
kanus-a pa ni maibot ang tayaon nga tunok?
lapos sa tsinelas, astang kasing-kasing natusok!

Hayan, gidala nas mga balod ang mga pag-antos
kaugalingon gilumos sa makaluyang gakos
mga luha gipanghilam-os ra daw sabaw sa nokos
Gugma ra gihapon, apan sa kaugalingon, ang nitapos…

Syndicate content