by Maanyag
Taipei City, Taiwan
 
Sa paghupas sa kanta nga Gangnam,
Aduna nasa'y bagong gikabuangan,
Ang nisikat nga kantang GWIYOMI,
Mao nasab ang unod sa tsismis ngadto og diri.
 
Koryano gyapon ang maong kanta,
Ang mga lihok pwerte rang sayona,
Pakyutkyut lang ang agi sa mga mata,
Ang paglihok sa kamot dali rang mamemorya.
 
Kinsa may dili malingaw magtan-aw,
Sa mga bidyo nga gipaambit sa mga taw?
Nga magpakyutkyut atubangan sa kamera,
Hilabina tong mga gwapo og gwapa?
 
Daghan kaayo ang misuwayng nisunod,
Sa kantang bida kaayo ang simod,
Mga artista og ubang mga batanon karon,
Niapil sa nausong kanta ning henerasyon.
 
Mahimuot na lamang kita kanila,
Sa nagkalain-laing bersyong ilang gipakita,
Apan kanusa man kaha kini taman?
Unsay musunod inig mapul-an ang katawhan?
 
Tinuod, ang mga mauso karon mulabay ra,
Dili magdugay og mailisdan ra,
Apan ang mga handumanan nga nahipos,
Sa alimpatakan magpabiling bag-o og dili malaos...