Tadtaran
by:Waredd

Higko ang dalan ug namilit sa bagtak ni Daryo ang mga puntik sa mga hugaw nga nag ahog mugna sa baguhay lang nga pag ulan. Ilalom sa tulay sa Bangkerohan sa dalang Pag-asa nangita siyag Butong nga gisugo sa iyang inahan nga gibus-aw tungod sa taas nga Uric.

" Sa sige lagi na nimog inom ug coke Ma, mao nang di jud na moubos, mag ayo man tingalig edialysis naka simbako!"
Sukmat niya sa iyang inahan nga nagsuling sa resulta sa laboratory. Magbagulbol kini nga siya rapoy nakasabot ug kung motubag man maoy iyang depensa kanunay nga tubig ras butong makahunad sa iyang taas nga uric.

Karon nagkulima iyang dagway sa init sa alas dyes kuwarenta. Gipangwitik niyang singot kinagis gikan sa iyang agtang. Nagpaniid si Daryo sa palibot, saku iyang mata ug asa naay nanindag butong.

"Gipiskat pod ning sukia ug nganong wa nilukat ug permit sa Bureau, akoy naamong aning kalakiha dah!" Mulo niyas hunahuna, pahinungod ngadto sa iyang ginapalitan nga gipadlakan gumikan sa pagkadelingkwente.

Gisuhid niyang mga kadaplinan. Galantaw ug naay maghapak-hapak ug sundang pero naabot nalang siya sa may ulingan wa gyud siya kahibalag ug butungan.

Nilanghab siyag lawom sa kapakyas ug kalit nasud-ipan sa nasimhotan nga daw angso sa way kaligo nga kabayo. Mipadayon paglakang iyang mga tiil, nalabyan na niya ang mga ukay ukayan. Gibati siyag pagpanghuot sa iyang apapangig. Sa iyang pagduko hapit na magtabon iyang anino sa iyang bayhon. Nagpanakla siyang nagsuling sa iyang de pulso nga relo. Alas Onse na pasado ang takna. Naghupaw siyag taman. Moliwag na unta siya balik sa giagian apan nahagip sa iyang panan-aw sa unahan ang tigulang nga naglaray sa iyang butong kilid sa dalan, murag gihuyop ug kamig nga hangin iyang kasingkasing.
Nakabatig kahupayan sa dughan, paspas siyang nipadayon sa nahimutangan sa tigulang.

Sa walay paglangan nangingkitar siya sa Maas.
"Pila na imong butong Nay?"
Wala siya gipanumbaling, namatikdan niyang nagsungsong kinig erpon sa dunggan. Gisenyasan niya kinis iyang kamot ug natagad siya, nangimugkimog kining nipugnit sa iyang erpon unya niyahat niya.
"Unsa diay ato Dong?" Malumong sukot sa tigulang.
"Mopalit kos imong butong Nay, tagpila mang buok Ani?"
"Kuwarenta ra na dong dala na buak."
Gisulod ni Daryo iyang kamot sa bulsa paggawas nagkumkom na kinig barya ug papel nga kuwarta.
"Gae kog tulo kabuok Nay ayaw lang buk-a"
Nag ihap siya nga gaestorya. Gitunol niya sa tigulang ang inihap ug nagyango yango kining naghiling sa gidawat. Nikagilkil ang sartin nga sudlanan sa kuwarta tapad sa sundang nga gitaop sa tadtaran pagbutang sa tigulang. Pagkasunod nagsugod na siyag hagpat sa mga butong. Iyaha lang kining tuktokon gamit ang buko sa tudlo mailhan na niya ang sakto nga butong.
“Pila na edad nimo Nay” ni Daryo nga nagsakwat sa butong nga napalit.
“Setenta y otso na dong kalooy sa Ginuo”
“Purya buyag lagsik paman ka Nay”
Uga nga pahiyom ang tubag sa lagas.
“Hain man diay imong mga anak Nay”
Nitutok niya kadali ang tigulang ug kalit nagpakaaron-ingnon kining walay nadunggan.
Mosiaw pa unta si Daryo pagsukit apan gisalindot nalang niya kini kay nakita niyang nilugmaw ang mga mata sa tigulang. Samtang pabalik na siya sa giagian gilingi niya ang tigulang, naglungko kini nga nagtaud napod ug erpon sa iyang dalunggan ug nagsugod napod sa lawom nga paghinuktok. Bisag layo na siya sa maong dapit wala mapapha sa iyang panumduman ang sumbalihok ganiha sa tigulang. Hangtod sa paghitangka niya sa iyang sakyanan bitbit niya di lamang ang kabug-at sa tulo ka butong nga pinalit kundili hasta pod ang ugdang nga kahaw-ang sa dughan. Gibundak niya ang lawom nga panghupaw. Gipahiluna niya ang butong sa likod. Giduol ang nanindag bulak atubangan sa iyang giparkingan. Mopalit siyag bulak. Duha ka bulak. Isa alang sa iyang asawa ug alang sa iyang mama.
*Happy Mother’s Day to all*