Ug ania naka!
Wa ko damha ang imong presensya
Pipila na pud ka adlaw ang milabay sukad ikaw nahisalaag
Apan mibalik ka sama sa iro nga niuli gikan sa paglaag
Ug bitbit mo ang bukog sa kinabuhi–
Gugma

Pagkaanindot sa pamati
Nga mahanduraw ko pag-usab ang imong katakus
Iputos ako sa imong katam-is
Ug dad-on ko ikaw sa himaya
Sama sa ka-ka, kita magbinukotay
Lakdap-lakdap pud ginagmay
Para dili magmika kining atong balay!

Ug ania na usab ang makalilisang mong tutok
Sa imong mga mata ako daw sama sa nahisalaag nga turista
Puno sa katingala, kay kon nganong napalibutan ako’g mga bituon
Nga too ko’g tuas kalangitan, ania man diay sa imong kahingpitan
Ug ako bulahan
Nga makasaksi sa kaanyag sa imong mata
Nga madanihon, ug nagpangidlap bisan paman sa kangitngit

Tuod ga aso ang kabugnaw sa panahon
Apan atong pagasaw-an ang nagbagang kainit sa atong pagbati
Taud-taud napud sukad ikaw makahigda sa akong mga bukton
Ug ako diha nagahapyod sa imong mga kabalaka
Nga basin sama sauna,
Dili napud magsilbi kining relasyona
Apan, saligi ako
Mahisama ako sa bato nga magmalig-on sa kalisdanan
Nga bisan pag yatak-yatakan o di kaha agi-agian sa mga sakyanan ug kalisdanan
Padayon akong magmalimbasog kinutoban sa akong kusog
Ako magpakaisog sa akong mga kahuyang
Aron barugan ang desisyon nga atong nasabutan

Ug busa, langga
Tapusa na ang imong kakulba
Ug gakson ta ang mga umaabot unya
Ipiyong ang imong mga mata
Kay ako anaa kanimo
Ug ikaw pirmente tua diri kanako
Sa akong dughan
Sa akong kalibutan
Ug sa atong paghinanok
Ugma, puhon
Dungan tang sugaton ang togtogaok sa manok.
Hinaot di naka mo biya.

–Donz 12/31/18