Midagayday Nga Mga Luha
By Genamos_US of Washingtong DC, USA
Usa ka gabii nga wala koy tulog
Sa mga panghitabo naghinuklog
Mga pulong unta akong tul-iron
Aron masabtan mo akong isugilon
Wala gayud nimo makita ang tinuod
Nga ang kasingkasing ko gipamatuod
Malisod sa akong dughan ang pagsabot
Kun man gani kasingkasing mo gisapot
Dili ba puwede kini nga atong estoryahon
Sama sa gibuhat nato kanunay sa kagahapon
Nahinumdom ka pa ba sa atong mga plano
Nga ang atong ugma napuno sa mga damgo
Gipangita ko ang mga tukma nga dalan
Aron ang gugma ta mabuhi imong laoman
Karon kay imo naman akong gitalikdan
Ang kasingkasing ko sama nga gilonupan
Pinalangga, kon imo man akong biyaan
Mag-unsa nalang ang akong kalibutan
Wala nga koy makitang kahayag sa ugma
Kay ang gugma ta napukan ug nahidagma
Ang kagahapon ug ang pahanon ang mag-uban
Mga katawa ug pahiyum nangluod gitakluban
Ang kasub-anan ug kasakit ang nag-ambahan
Kay ang akong kinabuhi wala nay kapuslanan
Ang bugtong lintonganay niining tanan
Ang gugma mo mihupas nga midagan
Wala nga koy mahimo sa imong pagbiya
Gawas lamang sa midagayday nga mga luha
Comments
Daghang salamat !!
Ang mga balak nga akong sinulat, ako ra man gud limitahan kay dili nako ihatag ang tanan kay mura nga ta ani magsugid ug drama sa estasyon. Akong hatagan og higayon ang bumabasa nga pagbukas sa iyang imahinasyon. Aron aduna usay gamayng kulbahinam. Dili nako tas-on ang mga pulong ug akong himoon nga simpli lamang aron usab makuha nila ang dagan sa balak. Kay kun walay giya niini basin sila mahitipas sa laing pultahan sa imahinasyon.hehehe.Ato ning ipadayon mga tinahod kung mga abay kining atong dila nga lunsayng binisaya. Mabuhi ang mga kaliwat nga BISAYA!!!