By: Maanyag
Taipei City, Taiwan
 
Lahi ra kaayo ang panahon,
Kung ikumpara ang sauna og karon,
Daghang kausaban akong nakita,
Og kana tagsa-tagsaon ta.
 
Sa kadtong bata pa ko,
Mga text text wala pa na mauso,
Telepono, mao ra'y kalingawan;
Magtelebabad, pirmi intaw'ng makasab-an.
 
Kung ang WALKIE TALKIE dunay "OVER" pirmi,
PAGER og BEEPER lahi sad ang paagi,
Kung gusto ka magpadala og mensahe,
Na hala! Ang operator mao'y istoryaheee!!!
 
Sa pagsugod sa panggawas sa cellphone,
5110, usa pa to's mga mahalon.
Aduna sad to'y Trium, Alcatel og Maxon,
Mao'y paliton kung ang budget kulangon.
 
Ang text wala pato'y bayad sauna,
Aron makasave, "drop call" ang pinaagi sa istorya.
Daghan kang makita, mga cellphone naa ra's bulsa,
Og ang mga isnatser? Aw, dyutay pa!
 
Hangtod nanggawas mga CP nga makacompose og kanta,
Ang mga tao mupili na'g walay antenna,
32, 33, 62, og 82
Dugangi og 10 sa tumoy mao nasa'y nauso.
 
Hinay-hinay cellphone nga colored naimbento,
Adunay bluetooth, mp3, camera, og video,
Iphone og Blackberry nakigkompetensiya,
Pero aduna gyud gyapo'y mga die hard sa Nokia!
 
Qwerty keyboard mao'y gusto nila,
Ang prepaid load, karon, unlimited na!
Touchscreen, mao nasa'y gipang-apas,
Mag-atang pirmi unsay bag-ong gawas.
 
iPod, iPad, og mga nagkalain-laing laptops,
Mas maayo gyud kuno kung ang brand "Mansanas,"
Ang mga digi cam og single lens reflex,
Oy! naunsa ba, panindutay naman sad og pics?
 
Posing diri, posing didto, mao na'y trabaho,
Mga nindot nga lugar, maglumba naman og adto!
Hongkong, Macau, Singapore, nakaadto naba mo?
Pa book nata'g ticket sa Cebu Pac kay o, gapromo!
 
Mga litrato upload lang dayon diretso,
Kung sauna sa Friendster, karon FB na'y bag-o!
Lingaw na kaayo kung adunay mukumento,
Uban e "LIKE" lang sa mga amiga'g amigo.
 
Dili lang kay kana ra ang nauso,
Namatikdan ko, mga tao hingatawa naman kaayo?
LOL, HAHAHAHAHA, og HEHEHEHEHE
Matag istorya sa FB naa gyud na pirmi!
 
Tinood man, kining mga butanga makalingaw,
Makapawala sa kalaay og kamingaw,
Maong sabay lang ta sa uso sa panahon,
Mao kini'y gitawag og EBOLUSYON...