By: Maanyag of Taipei City, Taiwan
 
Nakapanglingo-lingo ako nga gtanaw,
Sa balita niadtong miaging adlaw,
Kabahin sa manag-igsuong nabanggaan,
Gidaro sa dyip samtang sila milabang sa dalan.
 
Gikan sila magkuha og benepisyo,
Sa osa ka opisina sa atong gobyerno,
Sa pagkamatay sa ilang padre de pamilya,
Nga gi-atake didto sa Saudi Arabia.
 
Ang nakapaet pa sa nahitabo,
Kay nagpakalooy diay ang igsoon og hinangyo,
Ngadto sa nagmaneho nga nakabangga,
Aron ang igsoon matabangan pa unta.
 
Apan wala kini tabangi sa nakabangga,
Kay kuno iyang igsoon kamatyunon na,
Nadismaya ako nga nahibalo,
Nga may ingon ani diay'ng mga tawo.
 
Og sa dihang sila nakahay-ad lamang sa dalan,
Gitiwasan pa sa walay kasingkasing nga kawatan,
Daling mipunit sa bag dayong dagan palayo,
Ingon ani na ba gyud ka kawad-on sa ato?
 
Makapanlumo kaayo ang maong panghitabo,
Walay mga kalooy, walay kahadlok sa Ginoo,
Hain naman intawon ang ilang konsensya?
Imbis tabangan gitiwasan man hinuon nila?

 
Angayan ba gud nang ilang giingong, "Mas Lingaw sa Pinas?"
Kung dili masugpo ang mga badlungon nga pwerte ka mangtas?
Aksyunan unta og tarong sa atong gobyerno ang mga problema,
Dili lang kay puro propaganda og matam-is nga estorya...
 
2012.07.18