KAMINGAW SA KAHAPONON

Genamos_US's picture

KAMINGAW SA KAHAPONON
By Genamos_US of Washington DC, USA

Malandong nga kahaponon puno sa kalaay
Gikapoy naghigda sa kawayan kung lantay
Ang bugnawng hinuyohoy sa bintana milabay
Samtang ang kamingaw sa palibot misakay 

Wala ko masabti ang kamingaw nagpasulabi
Gihungit sa hunahuna ang kakapoy nagbayli
Mga mata gipiyong giganoy sa katulogon
Apan gihawiran sa di ko masabtan na emosyon

Gihiling ko sa kaugalingon ang hinungdan
Kon kining kabalisa angay ko lang pasagdan
Matugkad ko man ang hinungdan dili igsapayan
Kay bunga lang kini sa nag-inusarang dughan

Inanay kung giwala sa akong panumduman
Aron mabatunan ko ang kalinaw ning dughan
Hinginlan ko man kining kabalaka nagduladula
Nagpadayon nagpasulabi sa naglibog kung hunahuna 

Sa akong pagtakilid uban sa lawom kung panghupaw
Naponting ngadto sa karaang litrato ako nakatan-aw
Sa sook giabog-abogan daw nakalimtan sa mga katuigan
Ang pahiyom ni Inday makadasig sa naglubog kung galamhan

Samtang nag-inusarang nagpaabot sa oras sa kagabhion
Gianod ang hunahuna sa mga nanglabayng panahon 
Ang among pagpuyo dili man perpekto apan sa gugma kami gawasnon
Walay pagmahay sa kalipay ug sa kasakit manag-uban hangtond karon

Apan wala ko mabantayi ang oras sa kadali milabay
Milandong sa akong mga mata ang kangitngit mipahulay
Nibakod ug nagkarakara kay hapit na muabot si Inday
Kay wala pa makaandan sa among panihapon bisag gamay

Comments

Genamos_US's picture

Ordinaryo ra intawon ni ...

Hello Cookie, Kuyawan man sad ta ani oy! pangutan-on ang atong tinood na ngalan...:) perti man nato alyas-alyas ani.. :0 .. Bitaw in a lighter side..Dili ko writer intawon oy...Wa-il intawon ni Cookie. Lingaw-lingaw ra intawon ni ato, sulat-sulat ginagmay kung makalugar. Pawala sa kalaay ug kamingaw labi nga nahilayo sa atong nasod ug dakbayan sa Sugbo. Ang kamingaw sa atong nadak-an nga pinulungan nihit man dinhi gamiton sa gawas nasod. Bisag bisaya mag tagalog man dinhi. Anyways, masakpan ni akong tinood ngalan ani da... :) Daghan salamat sa imong paghapit ning maanindot nga dangpanan sa mga tiunayng bisaya. Mabuhi ka dinha ug padayon dinha sa imong pagsulat ug pagmahal sa atong binisayang pinulongan ug atong ipakuyanap ang atong pagka-PROMDI. :) da best!