By Maanyag Taipei City, Taiwan
 
"Molabay man ang pipila ka mga tuig,
Apan dili ko gayod makalimtan
Ang mga kalingawan sa akong pagkabata..."
 
Samtang ako galantaw sa mga kabataan karon,
Dili ko gayod mapugngan ang mahinumdom,
Sa mga panahon sa akong kabatan-onan,
Lahi ra sa ilang mga nasinati og namat-an.
 
Mga gagmayng butang kaniadto,
Makapalipay na kaayo kanamo,
Susama lamang sa sikat nga dulseng Bobot,
Sa pakapin nga singsing ikaw mahimuot.
 
Kinsa may dili malingaw og kinolekta,
Sa mga komiks ni Joe sa Bazooka?
Plastik balon maoy paboritong paburoton,
Padak-on pag-ayo, mga higala mutakla sab dayon.
 
Magshumoy og diyolen inig ting paniudto,
Bahala'g mapuno pa'g yuta ang mga kuko,
O dili kaha magdampa gamit ang mga lastiko,
Ipulseras lang dayon inig kahuman sa torneyo.
 
Tsainis garter maoy lukso-luksohan,
Paglukso og taas maoy paningkamotan,
Looy lang ang hago kon ang molukso dili papildi,
Maggunit na lamang sa tsainis garter pirmi.
 
Kuyog ang mga suod nga higala magdyakston dayon,
Magsabot daan kon pila ka eksibisiyon ang himuon,
Pwerte sad kaayo makapatid kon magtakyan,
Kapuliki gayod og gukod kon sa kontra maburakan.
 
Malukop pinangita bisan asa og kaka,
Gamit ang tukog didto sila ipasangka,
Himuan pa og balayan nga may kuwarto-kuwarto,
Esponsor na kanunay ang Emi og Rizal nga posporo!
 
Uso kaayo kaniadto ang magdakop-dakop,
Bahala na ang resulta magkasingot-singot,
Maningkamot nga pakusgan ang pagdagan,
Aron sa hago dili sayon nga madakpan.
 
Tubig-tubig, pulis-dunggab, bato-lata, og shatong,
Ang kalingaw aning mga dulaa walay makatupong.
Usahay magabhian na lamang og dinuwa,
Dili mabati ang kakapoy tungod sa kasadya.
 
Inig kagabie og magbrawon-awot man gani,
Tigmo-tigmo maoy mahunahunaan og dali,
Hangtod mag-estorya og mga nagkalain-laing sugilanon,
Mahatungod kaniadto, abat-abat, og uban pang sultihunon.
 
Ang panahon sa ting-uwan maoy ampay,
Kay magdula og ligid maglumbaanay,
Malimtan ba diay ang papel nga barko-barko?
Ipaanod sa tubig inig tuang sa uwan nga kusog kaayo.
 
Abril og Mayo, kon kanusa tingbakasyon og walay klase,
Maghimo og tabanog, labandera man o sapi-sapi,
Paninguhaon nga tulin ang gihimo og dili mutulilik,
Mapalupad lang sa kahanginan ilawom sa kainit.
 
Tinood, lahi na ang panahon karon og ang sauna,
Mga tawo maggukod na sa bag-ong teknolohiya,
Bisan ang mga bata mag-atubang nalang pirmi,
Sa mga selpon og kompyuter nga maoy gipalabi.
 
Tingale, wala na karon mauso,
Ang mga kalingawan namo kaniadto,
Apan bisan pila pa man ka bag-ong mga imbensiyon ang mamugna,
Dili gayod makatupong sa tumang kalipayng gihatag sa karaang dula.