Blogs

Dondie Labajo's picture

"MagkaBARKADA"

Sama sa naandan
adlaw napud nga mag-inusarang maglakaw sa kadalanan
kaila ang tanang tawong masugatan
apan walay matawag nga mga "higalang maduolan"

Apan sa pag-abot ko sa skuylahan
nausab ang akong nahimutangan
ang saunang nag-inusara
karon nakakita'g mga barkada

Sa kalit nga panghitabo
ang atong mga utok nagkatagbo
"Gimik ta na?" hagit pa sa usa 
"Sukol ko!" tubag nako sa way paduha-duha

Sa atong panag-uban, nasabtan ko ang inyong mga kinaiya
nabati ko na ang tagsa-tagsa ninyong mga tinagong estorya--
sa pagskuyla, sa mga problema ug sa pamilya
nga nabulgar tungod sa pagpatumba sa botilya

Ang kabayo atong giuban sa atong tapok
imbis atong sakyan-sakyan, atong giyarok
imbis sa kuwadra, sa baso atong gidasok
dayon gisugdan ang orasyon sa pagpatuyok-tuyok

Dondie Labajo's picture

KALINAW

Sa pagtakob sa tabon-tabon's akong mga mata
hikaplagan ko ang makita sa buta--
Paglaom nga bisan gihikawan sa panan-aw
tua ang kangit-ngit tupad sa kahayag... ang Kalinaw...

Kalinaw
talagsaon rang motumaw
kay ang kinabuhi puno sa karaw
ni sa pagtulog nagatukaw

Kalinaw
nagtago dapit sa mga awaaw
hilayo sa kakuyaw
haduol sa kamingaw

Kalinaw
usa ka kanta gikan sa ibabaw
kung ikaw maminaw
ang nagpuyo sa lawas makasayaw

Kalinaw
pag-abot sa kabalaka ikaw nahanaw...
dayong abli sa tabon-tabon's akong mga mata
nangandoy nga mayta ako buta...

-Donz 03/15/16
"Kalinaw"

luckwelalaan's picture

"Si Tuko ug si Tiki (Sukwahi)"

Adlawng Dominggo sa balay nagpuyo ra tawn ko,

Mopahulay para nalang maayo akong hubak na way hunongay.

Apan sa akong paghigda may nabati akong kasikas,

Daw mangtas nga namalikas.

 

Apan, sa pagsusi ko nakita ko

Ang Tuko ug ang Tiki,

Daw nihubad ang storyang  gugma sa akong pagtuki,

Ug saksihan ta ang sukwahi!

 

Si Tuko -- Ang dakog ulong Mananap,

Usahay bugason ug manglagom kung kini kiligon, kay lagi Itom!

Sukwahi si Tiki -- Hamis ug gamay'g panagway ug siya kang Tuko magsig tamay!

Si Tiki kung kini kiligon mapulahon kay lagi pution!

 

Apan, sa pagtutok ko nasuta ko nga si Tuko -- lalaki ug si Tiki -- lakin-on.

Siguro si Tuko balaknon,

Ug sigurado ko nga si Tiki

Mabulakon kay tam-is ug pahiyom.

 

LuXi0n's picture

Sa akong paglingi

Daw wala ko gyud damha
Sa mga panahong pipila
Mga tuig na milabay
Nimata ang dughan kong mipahulay

Ang kasakit na nabati
Niadtong panahong siya akong gipili
Pagbasol tinuod naa sa ulahi
Ug gisumpa kong di na paatik sa mga laki

Sukad wala na gyud nagpailad
Kay para nako mga laki sa ulo makalabad
Pero katong kita nagsugat sa dalan
Ang imung panagway akong natutukan

Molingiw ka lang ug moduko
Diretso molakaw hangtod makaliko
Wa nimo nakit-an sa imung paglabay
Ang pahiyom kong gamay

Apan niabot ang higayong dugay ng gihandum
Sa ilawm sa panganurong dag-um
Samtang ako nagduko naminaw sa kanta
Ikaw niagi ug nagpaatubang sa akoa

Sa akong paghangad, suta kong gugma mo gusto kong imung ihalad.
Sa imung mata nakita ang kakurat, sa dihang wa nimo damha akong paniplat.
Nibawi ka sa imung tan-aw, klaru kaayo na ikaw naulaw.

Busa ako nilantaw sa laing bahin, kay di gusto masipyat ning akong kasing-kasing.

LuXi0n's picture

Ang pan sa akong kape

Sauna motuo jud ko sa, "pukawa lang kog buwag namo",

Pero karun alas singko palang nagmata nako.

Way pagduha-duha sa higdaan mobangon dayun,

mag-init ug tubig, maglung-ag ug kan-on.

 

Pagsidlak sa adlaw pultahan akong ablihan

timailhan na nangmata na akong mga silingan.

Paglingi sa gawas,

ako magdahum, na makita imung lawas.

 

Di ko man tuyuon, pero akong mga mata mangita nimo.

sa may gripo tua ka naligo, macho kaayo.

Samtang ako naglingkod sa lamesa, naglantaw sa imuha.

Nagkutaw sa kape, nag-handuraw sa atoang duha.

 

Likod nimo na lapad kaayo, maayo siguro sandigan sa akong ulo.

Sa dughan mong bagtok, naglaway akong mga bitok.

Akong panan-aw naabot sa imung tiyan,

ug akong nakaplagan, ang lami na pan bisan walay palaman.

 

Cai's picture

KINABUHI

Ang kinabuhi sa tawo mahikanhon

Kahibulongan kon kini tawgon

Gintugyan kini kanimo

Maong ikaw, sa kalibutan nahimugso

 

Makahuna-huna ikaw ug makapangutana

Pahunghong nga paglitok sa imong baba

Adunay nabuhi sa hamubong higayon

Ug anaay ikaw, nagginhawa hangtod karon

 

Nagpasabot lang ba kini nga may tahas ka pa?

Ug ang ningpanaw sa kalibutan wala na?

Unsay anaa kanimo nga wala sa uban?

Nganong sila na una ug ikaw ania pa sa kalibutan?

#sinalagmasahunahuna

Dondie Labajo's picture

Buwan sa P A N A G H I G U G M A A Y

Kinalasang adlaw sa kinaunhang buwan
Enero traynta'y uno, naghigugmaay ang Adlaw og ang Bulan
Ug katong gabhiuna napuno sa paglabingay
dungan sa pagpakli sa kalendaryo--Buwan sa Panaghigugmaay

Unang adlaw sa ikaduhang buwan
Pebrero uno, nahugyaw ang mga katawhan
mapa naay uyab o single
nag-iya-iya'g status sa ilang wall

"Walay Poreber" maoy singgit sa mga bitter
kay wala pa nila nakit-an ilang mga partner
"Pero naay together" tubag sa mga lover
nga para nila ang "gugma makes life better!"

Aguy! Valentines Day na!
Mabuak na ang alkansiya!
para ipampalit og buwak inubanan sa letra
dayong kas-kas sa gitara para mang harana

Ug kanang gabhiuna
mag wisik-wisik ang gugma
mag uyog-uyog ang kalibutan
kay si "The One" man maoy kauban!

--Donz 02/02/18

Dondie Labajo's picture

Ang P A N A G T A G B O (Lunar Eclipse)

Sa akong paghangad
adunay pangitaon ang mibungad
talagsaon panghitabo sa langit, mi ladlad!
ug usa ka istorya sa gugma akong nahubad

Hayag ug malinawon ang kagabhion
gidasig sa masidlakong mga bitoon
apan nagsakit ang Bulan
kay kini nag-inusara man

Apan nawala iyang pagmaoy
kay karon matuman ang iyang pangandoy
nga adunay mo uban kaniya sa kalaay--
magtinandayay, mag-akbayay ug maghigugmaay

Ug mao kana si Adlaw--ang Hari sa Kabuntagon
sukwahi ni Bulan-- ang Rayna sa Kagabhion
Apan gihatagan silag higayon karon
nga maglabing sa makadiyot nga panahon

Sa unang halok ni Adlaw 
nabati sa kagabhion ang kabugnaw
Sa ikaduha, ang pagkababaye ni Bulan nanggimaw
Sa ikatulo, hilabiyang kalipay ang mitumaw

Pulong Bisaya's picture

Gugma kong Adunahan

 

Paliton ko ang tanan,
Kutob sa imong magahan,
Engon-ana ko ka adunahan, 
Nag-awas, murag wa nay ikasudlan.

Ihatag ko sa imo,
Ikaw mahimong bilyonaryo,
Kung dawaton ni nimo,
Murag nakajakpot sa lotto.

Gugma kong adunahan,
Buhaton ang tanan, maangkon ka lang.
Gugma kong adunahan,
Ehatag ang tanan, mapalipay ka lang.
Gugma kong adunahan,
Di makaankon sa uban, usa muangkon, ikaw lang, 
Gugma kong adunahan,
Ihurot ang tanan, kung mahutdan lang!?

Dondie Labajo's picture

TUBIG-INIT!

Sa sulod niining akong pagkatawo
adunay istoryang maikataho
og gamiton nako ang duha ka elemento
nga nagsangka-- si Tubig og si Kalayo

Si Tubig nga nag-agay-ay, nagpasayaw sa mga bato
hinay-hinayng gipahumok ang konkretong semento
ang nagpabuhagay sa akong dugo
og ang nagwas-was sa akong mga kasubo

Ug kini si Kalayo nagtago ra sa sulod sa posporo
apan kon kini mo kidhat, ikaw mo ulbo!
gamit iyang kainit, ikaw mamahimong abo!
apan kaniya, ang kinabuhi, gisimbolo

Ug sa talagsaong panagtagbo ni Tubig og Kalayo
ang Kalayo nahanaw ngadto sa mga aso
apan gikuyog niini ang kabugnaw sa tubig sa baso
ug ang nahibilin? Tubig-Init nga makapaso!

--Donz 01/27/18

Syndicate content