Blogs

Pulong Bisaya's picture

Gugma kong Adunahan

 

Paliton ko ang tanan,
Kutob sa imong magahan,
Engon-ana ko ka adunahan, 
Nag-awas, murag wa nay ikasudlan.

Ihatag ko sa imo,
Ikaw mahimong bilyonaryo,
Kung dawaton ni nimo,
Murag nakajakpot sa lotto.

Gugma kong adunahan,
Buhaton ang tanan, maangkon ka lang.
Gugma kong adunahan,
Ehatag ang tanan, mapalipay ka lang.
Gugma kong adunahan,
Di makaankon sa uban, usa muangkon, ikaw lang, 
Gugma kong adunahan,
Ihurot ang tanan, kung mahutdan lang!?

Dondie Labajo's picture

TUBIG-INIT!

Sa sulod niining akong pagkatawo
adunay istoryang maikataho
og gamiton nako ang duha ka elemento
nga nagsangka-- si Tubig og si Kalayo

Si Tubig nga nag-agay-ay, nagpasayaw sa mga bato
hinay-hinayng gipahumok ang konkretong semento
ang nagpabuhagay sa akong dugo
og ang nagwas-was sa akong mga kasubo

Ug kini si Kalayo nagtago ra sa sulod sa posporo
apan kon kini mo kidhat, ikaw mo ulbo!
gamit iyang kainit, ikaw mamahimong abo!
apan kaniya, ang kinabuhi, gisimbolo

Ug sa talagsaong panagtagbo ni Tubig og Kalayo
ang Kalayo nahanaw ngadto sa mga aso
apan gikuyog niini ang kabugnaw sa tubig sa baso
ug ang nahibilin? Tubig-Init nga makapaso!

--Donz 01/27/18

Dondie Labajo's picture

Palahubog nga Amahan

Nakig-istorya kanako ang kadalanan
gamit ang mga bundak sa linakwan
nga adunay padulong nga kadautan
ug sa wa pay segundo, nilagobo na ang purtahan

Walay linog, apan ga uyog-uyog ang iyang kalibutan
kay gihilabtan man ang nagpuyong kabayo-- aw nasikaran!
Sa pagkalipong, daghan na kaayo'g nga pamulong daw naay giyamyaman
mao kana ang istorya matag gabi-e sa akong palahubog nga amahan

Ang iyang tingog makapabangon sa kasilinganan
sa grabing pagkadasig, daw nagselebrar og kapiyestahan
apan ang gusto ra diay kay siya bukharan sa hegdaanan
ug sa iyang pagkahinanok, makatulog na gyud ang tanan!

Hahay, pagkalisod niining akong nahimutangan
sagol-sagol akong balatian
pagsabot kay lagi amahan
kalagot nganong taga adlaw man?

--Donz 01/27/18

Dondie Labajo's picture

GIHIGUGMA TIKA

Gihigugma tika
Apan ako nagduha-duha
nga basin ako e itsa-pwera
daw tagbayntesingko sa hantak, e antog ra!

Apan tinud-anay ning gibati ko para sa imuha
walay sukod, walay rason ug walay kapareha
kay sa pagbutok-butok ning dughana
ikaw man ang sulod sa'kong huna-huna

Hinaot inday sa akong mga mata
hikaplagan mo ang kaanyag nga talagsaon ra makita
kay sa pagkatinuod, ang katahom wala niining lawasa
kon dili, sa akong gugma nga walay sama.

Maong sa atong sunod nga pakigkita
hinaot malitok ko na ang mga pulong sa gugma
nga habay nang gibaid-baid daw espada
siyaro og sa akong pagduslak, kini maibot pa!

--Donz 01/27/18 

 

luckwelalaan's picture

"PARA KANG LANGGA NGA AKONG PINANGGA"

Kinsang tao gatoo?

nga nahigugma ko sa sama nimo.

sama nimo na mapahiyumon,

sama nimo na mahigugmaon,

sama nimo na mistisahon,

sama nimo na maanyagon,

ug sama nimo nga tomboyon.

 

Tomboyon pero gwapahon.

naglibog ko kung ikaw dalaga o ulitaohon.

basta sa akong mga mata ikaw matahom.

Ug pasyensya kay ikaw ra gayod

akong gihandom.

 

Walay laing babae nga nakapahimo kanakog in ani.

Lami man ang mani pero wala ko gatoo nga main ani.

Langga tagda na intawon ako,

Ako nga nahigugma kanimo.

 

luckwelalaan's picture

"NAHIGUGMA UG GAHULAT"

Sa dihang Mototuk ko sa iyang mga mata,
daw akong dughan kalit lang nangangha.
sa mala-anghel niyang hitsura,
wala kapugngi sa akong dughan nga mokatawa.
Tumang kalipay ang akong masinati ni Inday!
Kung makakita lang gamay sa maanindot nyang kilay.

Sa akong dughan Mahikaplagan ang iyang pangalan,
Ug walay duda nga siya ang apan-apan sa lunhaw kong daruhan,
Ang buyog sa akong tanuman,
Ug siya ang buwak sa akong punoan.

Sa makalilisang nyang Pahiyom,
Daw marag mangga nga hilabihang kaaslom!
ug pirme kulang pangitaon.
Kada pamilok king akong mga mata.
Halata, nga siya ang akong gipangita.

Siya ang pinaka pinalangga sa iyang Amahan,
Ug siya ang Prinsisa sa akong dughan.
Nahigpatik nas akong alimpatakan,
Nga dili gayod nako siya pasakitan.

Talagsa lang kami magkahimamat,
Talagsa ra usab kaming magkasugat.

Dondie Labajo's picture

MGA BATAN-ON KARON

Walay sama, kinabuhi’s mga batan-on karon
tanang kaboang gipupo murag utanon
tanang kiat di na malista’s dahon
apan makatagbawng kalipay, daw kamunggay, haros gihapon!

Sauna, ang kabayo sakyan pa nila
apan karon imnon na
daw sabaw sa tinuwang gisulod’s botilya–
linat-ang kabayo, hala higop taman’s ginhawa

Sa tinuoray, kung ang tawo uhawon
tubig ang unang pangitaon
pero lahi na sa mga batan-on karon
imbis ‘tubig, tubig’, ‘baso, baso’ na hinuon!

Ato nalang unta silang sabton
kay ang oras lumalabay, edad magpadayon
unya moabot ra ang tukmang panahon
nga silang manginabuhing malinawon… puhon!

-Donz 10/07/17

Dondie Labajo's picture

Ang Kamingaw

Bisan sa akong pagkahugyaw
nahiagom ko ang hilabihang pagkamingaw
daghan lagi og higala
apan gamay ra ang tinuod nga kaila
Sanglit kay akong tinuod nga batasan
gitrangkahan ra's sulod's kaban
bahala uroy og kini matay-an
basta dili lang sayon-sayonon og pagahimuslan.
Nan, sa kamingaw ako nalingaw
sa pagpaminaw sa mga hagawhaw
niining kasing-kasing kong' gi uhaw
nga gitagbaw sa mga alindahaw
inubanan sa mabulokong alindahaw
nga naghatag og dasig sa akong adlaw.

-Donz 01/16/17

 

Dondie Labajo's picture

ANG TINDAHAN SA KINABUHI

Tinuod, kinabuhi lumalabay ra
daw tindahan, mangabli dayon manira
kay mahiabot man gayud ang takna
nga mamahulay na
ug ikaw nga nag yad-ak, misulay's pagtuktok's kapalaran
apan kini hinanok na busa dili ka ablihan.
Kato bitaw'ng mata pa, imo rang gi agi-agian
wala gayud palita daan ang gikinahanglan
karon nalang nga nana kay ganahan?
Hala!, pagtukaw kauban ang mga lamok
hangtod sa maabtan ka's tuktugaok's mga manok
aron sa pagpangabli
makatarong ka'g pamili
kung ngadto ba ka's imong ganahan
o di ba kaha ngadto's imong gikinahanglan?

--Donz 01/16/18

Dondie Labajo's picture

Unsay PASKO?

Nahiabot na pud ang kahigayonan
nga kita magsaulog sa naandan
kay lagi ang panahon pas-pas mo dagan
adlaw napud sa Iyang natawhan!

Matataw sa tagsa-tagsa ka panimalay
ang nagkadaiyang desinyo ug bitay-bitay
inubanan sa mga parol nga nagkiay-kiay
daw kini gisul-uba'g sayal ni nanay.

Malantaw pud ang lunhawng punoang walay ugat
nga gidasig sa mga sugang nagpangidhat
gisab-itan pa gyu'g mga bolang daw bobot
astang medyas ug sungkod's duwende, labot!

Wala na'y kabutangan ang lamesa
kay nangandam sa umaabot nga kumbira
mga katawhan nagpagutom daw binilanggong tigre sa hawla--
basta makagawas, hala subad taman's ginhawa!

Tinuod, basta Pasko busog ang mata ug ang tiyan
apan ang kalag niwang kay gihikawan
sa mga pagkaong dili matilawan
apan makabusog sa taman.

Syndicate content